5 stillingar innan kommunikasjon i årets traineeprogram

Framtidsfylket har nemleg fem ledige traineestillingar innan kommunikasjonsfaget. Traineebedriftene går breitt ut når dei søker etter ein medarbeidar, og fellesnemnaren er at du brenn for god kommunikasjon:

Lotteri- og stiftelsestilsynet ser etter ein engasjert kommunikasjonsmedarbeidar med relevant utdanning. Dei tilbyr ein spennande arbeidsplass med over 70 kunnskapsrike og engasjerte kollegaer, og du vil blant anna jobbe med innhaldsproduksjon, kampanjar, mediehandtering og brukarundersøking. Ein skikkeleg kickstart på karrieren for deg som ønsker å jobbe med kommunikasjon!

Tibber er verdas første heildigitale straumselskap og ei kul start-up bedrift mange drøymer om å jobbe i. No ser dei etter ein ivrig trainee som brenn for at kunden skal ha ei god oppleving av Tibber. Du vil jobbe med heile kundereisa og blant anna skrive artiklar til Tibber sitt Help Center.

Tibber har eit inkluderande arbeidsmiljø og søker no fire trainear.

Norec er ein attraktiv arbeidsgjevar og ein poppis blant jobbsøkarane. I år ser dei etter ein trainee som kan hjelpe dei med marknadsføringa og formidle Norec sitt arbeid eksternt og internt. I tillegg til at du får vere del av eit dyktig kommunikasjonsteam, lokkar dei med vaflar og quiz på fredagane.

Tenk å få jobbe med kommunikasjon samtidig som du er med på å formidle viktig forsking og innovasjon? Helse Førde ser etter ein initiativrik trainee som kan bidra til nytenking og innovasjonskultur, og som har interesse for både kommunikasjon og nyskaping. Verdt å sjekke ut om du likar tanken på å formidle helse.

Sunnfjord kommune ser etter ein trainee som er kreativ og synest innovasjon og velferdsteknologi er spennande. Du vil blant anna jobbe med sosiale medium, video og innhald til nettsider. Ei stilling for deg som kunne tenke deg å løfte Sunnfjord kommune sin kommunikasjon til nye høgder.

Kva vil det seie å vere trainee?

Ei traineestilling byr på brei arbeidserfaring, personleg utvikling og nye nettverk. Som trainee er du tilsett i éi bedrift i Vestland i eitt år, men mange får etter kvart tilbod om fast jobb. Som trainee får du:

• Ein unik overgang frå studieliv til arbeidsliv
• Innsyn i næringslivet i Vestland
• Eigen mentor i bedrifta som følger deg opp
• Traineesamlingar med fagleg og sosialt program
• Studietur til utlandet
• Oppleve Vestland <3

Du som søker:

• Har utdanning på bachelor- eller masternivå
• Har maksimalt tre års arbeidserfaring etter avslutta studiar
• Beherskar norsk som arbeidsspråk
• Vil litt meir i arbeidslivet

Ikkje ditt fagfelt? Sjå alle 36 traineestillingane for 2021/22 her.