Norec søker trainee innan marknadsføring

Om stillinga

Norsk senter for utvekslingssamarbeid (Norec) er eit statleg forvaltningsorgan under Utanriksdepartementet. Vi forvaltar tilskot til internasjonal utveksling av tilsette mellom land i Afrika, Asia, Latin-Amerika og Noreg. I 2019 var 200 organisasjonar frå 24 land involvert i 90 prosjekt med støtte frå Norec. Vi deler ut 140 millionar bistandskroner i året, og hovudoppgåva til kommunikasjonsavdelinga er å dokumentere kva midlane går til.

No ønskjer vi å ha ein marknadsføringstrainee med på laget. Er du klar for å jobbe med internasjonale spørsmål frå Førde? Vi søker nysgjerrige og kunnskapslystne nyutdanna som vil vere med å utvikle Norec til eit nasjonalt kompetansesenter for internasjonalt utvekslingssamarbeid.

I Norec vil du få 40 engasjerte kollegaer som har heile verda som sin arbeidsplass. Kommunikasjonsavdelinga i Norec består av eit team på fem, og vi produserer film, tekst og innhald til sosiale medium, nettside og nyheitsbrev. I tillegg hjelper vi alle avdelingane i Norec med intern og ekstern kommunikasjon.

Tilsetting: August 2021 til august 2022.

Arbeidsoppgåver

• Jobbe med å formidle Norecs arbeid eksternt og internt
• Jobbe med digital marknadsføring, innhaldsproduksjon, foto og video
• Publisere i sosiale medium, lage nyheitsbrev og oppdatere nettsider
• Utforme grafiske produkt og koordinere grafiske tenester
• Jobbe tett på flinke og dedikerte fagfolk som brenn for sine felt
• Få ei unik forståing av både styring av ei statleg verksemd, og utveksling som eit utviklingspolitisk verktøy på den internasjonale arenaen

Kvalifikasjonskrav

Felles krav til alle som søkjer stilling som Framtidsfylket-trainee:

• Minimum bachelor eller mastergrad
• Maksimalt tre års arbeidserfaring etter enda studium
• Norsk som arbeidsspråk - munnleg og skriftleg

Om deg

Det er fint om du har:

• Relevant høgare utdanning innan kommunikasjon, PR, journalistikk, digital marknadsføring eller liknande
• Svært gode norsk- og engelskkunnskapar, både skriftleg og munnleg
• Gode kommunikasjons- og samarbeidsevner
• Evne til å jobbe sjølvstendig, med god prioriteringsevne

Det er ein fordel om du har kjennskap til Adobe-pakken

Vi tilbyr

I Norec vil du få dyktige kollegaer som er opptatt av å ha eit godt arbeidsmiljø. Som del av eit lite team, får du mogelegeheit til å påverke korleis vi driv kommunikasjonsarbeid. Vi har gode velferdsordningar, vaflar og quiz om fredagane, og om du likar å trene, kan du gjere det i arbeidstida. Vi har fleksibel arbeidstid, så du når ein topptur før du stemplar inn om morgonen.

Stillinga er lønna etter stillingskode 1429 Aspirant.

Som Framtidsfylket Trainee får du:

• Ein spennande jobb og eit nettverk med andre traineear i bedrifter i Vestland fylke
• Fagleg og personleg utvikling
• Innsyn i eit mangfaldig næringsliv som for få kjenner til
• Fire traineesamlingar og ein utanlandstur