– Opnar auga for arbeidslivet i Sunnfjord
Tips frå ei tante fekk Kari til å sjekke ut programmet på Elevate. Det angra ho ikkje på.
– Eg bur eigentleg ikkje her, seier Kari Rasdal Vik (26). Tanta mi tipsa meg om å sjekke ut programmet til Elevate. Det gjorde eg, og no er eg her, smiler ho.
«Her» er Lotteri- og stiftelsestilsynet sitt eige lounge-område. Mjuke stolar, varm kaffi og digg lunsj. Det er berre til å lene seg tilbake for fagleg påfyll. Irene Fossen, aka Frøken Klarspråk på LinkedIn, skal i dag lære oss å skrive oss til tillit. Nær tretti personar har tatt turen for å høyre på ho, og i publikum er det fleire som jobbar med kommunikasjon, men også andre fagfelt er representert.
Irene Fossen er «Frøken Klarspråk» på LinkedIn.
Nær 30 personar ville lære meir om å skrive seg til tillit.
Nyttig påfyll for fleire fagfelt
Kari har ein master i psykologi, men er glad i å skrive og synest dagens tema er nyttig uavhengig av kva fagfelt du jobbar innan:
– Du kjem stadig i situasjonar der formidling er viktig. Eg likte tipset om å alltid vere bevisst på mottakaren, og at det relasjonelle også er viktig når du skriv til nokon.
Fast jobb, men open for forslag
Kari er frå Bryne, men har familie i Sunnfjord. Det er også i Bryne ho snart startar i fast jobb som pedagogisk-psykologisk rådgivar. Såleis er ho kanskje eit håplaust tilfelle for festivalen sitt viktigaste mål: Å få fleire til å både bli og søke seg til arbeidsmarknaden i Sunnfjord. Men det er ikkje Kari einig i:
– Festivalen opnar auga for kva jobbar du kan få her. Sjølv om eg snart startar i fast jobb ein annan stad, veit eg at det finst masse spennande her også. Eg er ikkje framand for å søke jobb i Sunnfjord i framtida.
Med ein master i psykologi ønsker ho å jobbe innan helse.
– Eg har merka meg at det skjer mykje interessant innan psykologi og helse i området, og at her er eit spesielt innovativt miljø.
"Planlegginga startar nuh!"
I gang med neste års festival
Lise Lydersen i Sunnfjord Utvikling hadde ansvaret for gjennomføringa av årets festival. 17 ulike arrangement stod på programmet til festivalen som er kjend for å kombinere fag med fest. Her kunne du delta på alt frå styrekurs og lunsjkurs om AI og berekraft, til boksing, ølsmaking og gatefest.
– Korleis har det gått?
– Vi er fornøgde med kvaliteten på programmet og har fått gode tilbakemeldingar frå publikum. Vi skulle gjerne hatt fleire deltakarar i år, og ser at vi må starte planlegginga tidlegare.
Dato for neste års festival er allereie satt, og det same er første planleggingsmøte.
– Neste år skal vi treffe både næringsliv og publikum betre. Difor startar planlegginga nuh!
