Operasjon trainee

– Åh, hjelp, er det fleire som bryt ut når dei ser tre morske, militærkledde personar vandre rundt med hendene på ryggen.

– Gøy! Gliser ein annan trainee.

Vi er på sandtaket på Vie i Førde. Perfekte omgjevnader for nokre timar med adrenalin, frustrasjon og meistring.

Klar: Matilde Gjesdal var ein av dei som tok imot utfordringa med glede og iver.

Ikkje imponert

– De kan vere så ueinige de vil i dag, men det bryr eg meg ikkje om, ropar Rune Øksenberg, før han ber dei om å stille seg opp.

Han himlar med augene:

– Det er så dårleg takt som det kan bli. Høyrest ut som eit takras!

Oppstilling: Rune Øksenberg er ikkje imponert over takten til traineeane

Operasjon trainee

Rune Øksenberg har jobba sju år i Forsvaret, og i dag har løytnanten fått jobben med å leie operasjonen. Med seg har han sersjant Dan Gøran Espedal og medhjelpar Camilla Søvig. Svein Inge Bjørkedal i arrangementselskapet Hending står bak Skvadron trainee, og har sydd saman eit opplegg som skal utfordre «rekruttane» både psykisk og fysisk.

– Du kan lære mykje om deg sjølv når du blir sett under press, seier Linda Hovland, dagleg leiar i Framtidsfylket trainee.

Det går mot slutten for årets traineekull, men éi siste samling står for tur. Dei siste åra har traineeane fått ein smakebit på rekruttlivet som del av programmet.

– Det set vi på kontoen for lagarbeid og personleg utvikling. Mykje av det som skjer her i dag er overførbart til arbeidslivet, forklarar ho.

Hinderløype: Samarbeid og lagkjensle er stikkorda når traineeane skal komme seg gjennom ei fysisk kreevjande hinderløype.

Alt for laget

Traineeane skal få prøve seg på minerydding, skytetrening og hinderløype – og konkurranseinstinktet kickar fort inn.

– De MÅ samarbeide. Du skal ikkje klare deg betre enn andre. Berre det som blir gjort for at laget skal lukkast, er av verdi, seier Øksenberg, mens han observerer eine laget planlegge å frakte ei tønne med vatn til toppen av sandtaket.

Minerydding: Å rydde miner på ein onsdag formiddag er ikkje berre, berre for kontortilsette.

Stort mentalt press

Skytetreninga krev fokus for å treffe blink, hinderløypa lagarbeid, medan minerydding krev 100% konsentrasjon:

– Det er stort mentalt press i å leite etter miner og eksplosivar, forklarar Dan Gøran Espedal.

Han har lang erfaring frå minerydding i internasjonale operasjonar og veit kva han snakkar om. Seinare på dagen skal traineeane få høyre foredraget hans "Mitt liv".

– Deg kan vi berre legge inn på Haukeland med ein gong. Slik kan du ikkje stå, seier han til ein av traineeane, ristar på hovudet og smiler lurt.

– Det er heldigvis ikkje på ekte, ler ho som har fått i oppgåve å vere lagleiar og har ansvar for laget sitt.

"Det er heldigvis ikkje på ekte"

Uvant å få kjeft

Sigrid Helgheim Hatten (22) er trainee i i PWC, medan Malene Skurtveit Rossnes (24) er trainee i Sparebank1 Sogn og Fjordane. Dei har nettopp fullført alle stasjonane og verkar fornøgde med å vere ferdig.

– Fekk de noko ut av dette?

– Nei, eg er eigentleg berre sliten, svarar Sigrid og ler.

– Men ok. Litt meistringsfølelse blir det jo.

– Korleis er det å bli kjefta på?

– Uvant. Ikkje kom her og fortel meg kva eg skal gjere, liksom, ler Malene.

– Men så veit du jo at det ikkje er i fullt alvor. Og då er det litt lettare å ta imot kjeften.

Lagseier: Meistring og lagfølelse var målet. Noko traineeane heilt klart fekk til.

Gira: Nokre meir gira enn andre.

Overførbart til arbeidslivet

Begge er einige i at øvingane er gode for å bli kjend med seg sjølv og finne ut kva som er best for laget.

– Du tilbydde jo meg hjelp i hinderløypa, men eg sa nei. Eg skulle slått til på den, for eg var forferdeleg sliten, seier Sigrid til Malene.

Og slik er det kanskje i arbeidslivet også. Har du mykje å gjere, kan det vere lurt at ein kollega bidrar. På den måten kjem prosjektet i mål utan at nokon blir «forferdeleg sliten».