– Alle arbeidsoppgåver kan bli trivelege med trivelege folk rundt seg

På kaiområdet i Svelgen ligg Elkem Bremanger – ein av verdas mest spesialiserte industribedrifter innan silisiumbaserte materiale. Her blir det produsert viktige komponentar til solceller, elektronikk og mobiltelefonar. Men bak all teknologien og produksjonen er det menneska som står i sentrum. Heile 250 tilsette arbeider ved fabrikken og utgjer hjartet i verksemda.

Vi har møtt HR-koordinator Nora Caroline Teigene (29) og automatikar og elektrikar Hanna Solheim (25) til ein prat om kvardagen på Elkem, livet i Svelgen og kvifor fleire burde vurdere ei framtid i Bremanger.

Flytta heim og fann ny jobbveg

Nora er oppvaksen i Svelgen, men studerte i Bergen. Ho ville helst heim etter studiar, men hadde ingen klare planar. Med utdanning som ergoterapeut og vidareutdanning i folkehelse, var ho open for å flytte der ho fekk jobb.

– Heldigvis dukka det opp ein jobb i Svelgen.

Ho starta karrieren med fem år i NAV. Då det opna seg ei moglegheit som HR-koordinator ved Elkem Bremanger i august i fjor, greip Nora sjansen. Overgangen til industrien har vore både lærerik og motiverande.

– Arbeidskvardagen er variert, og eg får brukt mykje av det eg har med meg frå tidlegare erfaring. Eg likar å jobbe med menneske, finne gode løysingar og bidra til at folk kan stå i jobb. Her får eg jobbe med alt frå rekruttering og løn til oppfølging og utvikling.

"Eg likar å jobbe med menneske og finne gode løysingar"

Nora Caroline Teigene er HR-koordinator ved Elkem i Svelgen.

«Fuck it – vi køyrer på»

Hanna kjem opphavleg frå Brekke, men bur i dag i Svelgen. Ho har jobba på Elkem i seks år og stortrivst i ei rolle der ingen dagar er like.

– Eg vart tipsa om å søke lærlingplass her. Broderen overtyda meg om at dette var ein bra jobb. "Fuck it – vi køyrer på", tenkte eg. Så flytta eg til Svelgen, og resten er historie, ler ho.

Valet av yrke var kanskje ikkje tilfeldig. Både far og bror jobbar innan same fagfelt, og interessa for tekniske løysingar har vore der lenge.

– Det er masse forskjellig å drive med her. Nytt og gammalt utstyr, enkelt og komplisert – og så er folka noko heilt spesielt. God humor, godt humør, og folk du kan stole på. I det eine sekundet kan eg klikke på kollegaen min, i det neste er vi bestevenner, ler ho.

"I det eine sekundet kan eg klikke på kollegaen min, i det neste er vi bestevenner"

Hanna Solheim er automatikar og snart elektrikar i Elkem.

Ein arbeidsplass som vil deg vel

Både Nora og Hanna trekkjer fram arbeidsmiljøet som det viktigaste ved Elkem.

– Sjølv den verste dritjobben kan bli triveleg om du har trivelege folk rundt deg, seier Hanna, og skildrar situasjonar der ho er dekt i støv og skal prøve å utføre ein jobb i fullt verneutstyr.

– Av og til får du lyst til å rive av deg den maska, ler ho.

Elkem Bremanger er ein stor arbeidsplass i ei lita bygd, og nettopp det gir rom for mange moglegheiter.

– Du får prøve ting du aldri har gjort før, utvikle deg og finne dei rollene som passar deg, seier Nora.

Bedrifta satsar sterkt på lærlingar og kompetansebygging, med rundt 20 lærlingar kvart år innan mellom anna elektro, kjemiprosess og vedlikehald.

– Elkem ønsker verkeleg å hjelpe oss opp og fram, seier Hanna. – Eg har nett starta på fagbrev nummer to, som elektrikar i tillegg til automatikar. Det gjer at eg står sterkare vidare.

Gode kollegaer: Ifølge HR-koordinator Nora gir Elkem rom for å finne sin plass.

Dei fleste distriktskommunar kan lokke med vakker natur, men Bremanger er faktisk litt unik. Kvite strender, hav, fjord og dramatiske fjell i eitt.

Fellesskap også utanfor arbeidstid

Trivsel handlar ikkje berre om jobben, men også om livet rundt. I Svelgen skjer det meir enn mange trur, spesielt for unge vaksne.

Nora er ein av initiativtakarane bak bygdas U40, eit tilbod for folk under 40 på tvers av bedrifter.

– Vi ønsker å skape ein møteplass for alle, også dei som ikkje nødvendigvis driv med fotball eller trening. Det handlar om å bli kjend, bygge nettverk og ha det kjekt.

Responsen har vore over all forventning: 80 deltakarar på første samling, 50 på den neste – med alt frå tacobuffet og vinsmaking til planlagde grillkveldar og aktivitetar i sommar.

– Det er utruleg positivt å sjå, og Elkem har vore ein viktig bidragsytar, seier Nora.

Hanna kjende ingen då ho flytta til Svelgen, men opplevde raskt kor inkluderande miljøet er.

– Du må vere litt frampå sjølv, snakke med folk og engasjere deg. Eg vart invitert på krabbefest i eit naust med kollegaer – det seier sitt.

Når folk flyttar og vel å bli

Begge peikar på kombinasjonen av natur, tryggleik og moglegheiter som ein stor styrke ved å bu i Bremanger.

– Eg likar meg i området. Bremanger har ein spesielt fin natur med mange fine fjellturar. Og så er det kort veg til både Florø og Førde – utan å måtte bu midt i smørja, seier Hanna, som kan røpe at etter seks år i Svelgen er det no også er ein mann og ein tomannsbustad inne i bildet.

Når nye tilsette og lærlingar takkar ja til jobbtilbod og blir verande, gir det håp for framtida.

– Det er kjekt å sjå korleis folk utviklar seg frå dei kjem som ferske lærlingar til dei står støtt i fag og jobb, seier Nora.

– Og så er det kjekt at dei vel å bli her, avsluttar ho.