Vil du jobbe med marknadsføring hos Musea i Sogn og Fjordane?

Vi tilbyr ei spennande og variert traineestilling for deg som ønsker å utvikle deg innan marknadsføringsfaget. Som trainee hos oss vil du jobbe med å gjere tilboda ved musea våre betre kjent. Du produserer innhald som fenger og formidlar alt det vi har å by på. Du har eit godt blikk for visuell kommunikasjon og kan bruke digitale kanalar til å skape engasjement og besøkslyst. Og du følger med på tal og statistikkar slik at vi blir enda meir treffsikre i vår marknadskommunikasjon.

Samlingane våre spenner frå urban kunstscene til eldgamle bygningar og skikkar. Frå pulserande historiske kystsamfunn til malaren Nikolai Astrup sitt småbruk i Jølster. Frå lafta utedassar og eksport av kvernsteinar i vikingtida, til ein Ford Escort frå 1980-talet og rykande ferske kunstinstallasjonar. Noko for ein kvar smak, og mykje potensiale å ta ut i vår marknadskommunikasjon. Vi har til dømes ein Instagramkonto som skal re-brandast og byggjast opp. Kanskje du kan vere ein nøkkelperson i det arbeidet?

Dette håpar vi du kan hjelpe oss med:

• Skape marknadsinnsikt
• Bistå og utvikle marknadskommunikasjon i SoMe-kanalar
• Bistå dei 12 enkeltmusea våre i deira marknadskommunikasjon, og gje råd og hjelp med verktøy som Facebook Business Manager
• Innhaldsproduksjon
• SEO – søkemotoroptimalisering
• SEM – søkemotormarknadsføring

Vi kommuniserer på nynorsk, så du må beherske dette godt.

Ettersom det vert ein del reiseverksemd mellom våre 12 museum, vil du også ha behov for førarkort og bil i denne stillinga.

Dette er oss

Musea i Sogn og Fjordane driftar og utviklar tolv ulike museum mellom fjord og fjell i Sunnfjord, Nordfjord og Sogn. Årleg gjev vi nær 40 000 innbyggarar og tilreisande kunnskap og opplevingar innan kulturhstorie og kunst. Vi har eit mål om å auke dette talet til 70 000 dei neste tre åra. Det håpar vi du vil vere med å bidra til!

Vi har kring 70 faste tilsette medarbeidarar og fleire mellombels tilsette i sesong. Museumsvertar, museumspedagogar, museumsleiarar, konservatorar, handverkarar og administrasjon med fleire jobbar på dei ulike musea. Vi er ein mangfaldig organisasjon og hos oss vil du oppleve både å møte fagnerden som helst vil sitje for seg sjølv, og den veldig pratsame kollegaen, mykje latter og opne dører. Elles likar vi å samle heile organisasjonen nokre gongar i året for fagleg og sosialt påfyll, og fleire av våre kollegaer er flinke til å finne på kjekke ting i lag også etter jobb. Vi trur du vil ha det kjekt med å bli kjent med dei ulike miljøa våre og eigenartane deira.

Arbeidsstad:

Fellesadministrasjonen som du skal jobbe i sit på Sandane, men vi ønsker å finne ei fleksibel løysing for deg. Du må også pårekne ein del reising rundt på dei ulike musea våre for å produsere innhald, bygge relasjonar og kunnskap.

Send inn ein søknad innan 19. juni, så høyrer du frå oss.

Som Framtidsfylket-trainee får du:

• Ein spennande jobb og eit nettverk med andre traineear i bedrifter i Vestland fylke
• Fagleg og personleg utvikling
• Innsyn i eit mangfaldig næringsliv som for få kjenner til
• Fire traineesamlingar og ein utanlandstur
• Vestlandet 💚

Felles krav til alle som søker stilling som Framtidsfylket-trainee:

• Minimum bachelor eller mastergrad
• Maksimalt tre års arbeidserfaring etter studium
• Du må forstå og kunne kommunisere på norsk. Sjå elles arbeidsgjevar sine krav for språkkunnskap

Du vil jobbe som trainee hos oss i eitt år – frå august/september 2023 til august 2024.