Prosjektleiar besøksforvaltning - engasjement på tre år

Er du oppteken av reiseliv, utvikling og berekraft?

Då kan du vere rett person til stillinga som prosjektleiar hjå oss!

Vestland fylke har som mål å bli ein av dei fremste regionane i verda for berekraftige, naturbaserte opplevingar med høg kvalitet. Vestland fylkeskommune ynskjer gjennom prosjektet "Besøksforvaltning i Vestland" å vere ein pådrivar for å nå dette målet. Besøksforvaltning handlar om å sikre ei berekraftig utvikling av reiselivsnæringa, og dette føreset at næringa har ein positiv innverknad for samfunnet rundt.

Fylkeskommunen har tidlegare gjennomført forprosjektet “Besøksforvaltning i Vestland”. Vi er no klar til å starte hovudprosjektet og treng ein dyktig prosjektleiar!

Arbeidsoppgåver

Dine viktigaste arbeidsoppgåver vil vere å utvikle og leie prosjektet. Prosjektet har som mål å sikre at:

- reisemål blir forvalta etter ein overordna plan

- både gjester og fastbuande sit att med gode opplevingar

- auken i verdiskaping og sysselsetjing i hovudsak skjer i lokal reiselivsnæring

- reiselivsnæringa skaper positive ringverknader for anna næringsliv

- natur, landskap, by og bygdemiljø ikkje blir påført for stor slitasje

- identitet, lokal historie, mattradisjonar og kultur blir formidla

Du vil få spele på og arbeide tett saman med kollegaer i fylkeskommunen. Fagfelta reiseliv, landbruk og samfunnsutvikling er sentrale, men arbeidet vil også ha koplingar mot andre fagområde i organisasjonen. Reiselivsorganisasjonane og kommunane, både på politisk og administrativt nivå, vil vere viktige samarbeidspartar. Partnarane vil også vere representert i styringa av prosjektet og arbeide aktivt for å gjennomføre det.

Som prosjektleiar vil du vere sentral i å samle ulike aktørar og legge til rette for eit godt samarbeid. Aktuelle tema vil vere alt frå kunnskapsdeling og mobilisering, utforming av handlingsplanar, til å setje i verk konkrete samarbeidstiltak. Du vil også arrangere samlingar, nettverk, konferansar og legge til rette for å utvikle kunnskap og kompetanse.

Noko reising vil vere ein del av arbeidet. Kontorstad er Leikanger i Sogndal kommune eller Bergen.

Kvalifikasjonar

Den som vert tilsett må ha:

• relevant høgare utdanning, helst på masternivå. Søkjarar med utdanning på bachelornivå og med lang og relevant erfaring er også aktuelle for stillinga.
• innsikt i temaet besøksforvaltning
• kjennskap til reiseliv og reiselivsorganisasjonane sin struktur
• prosjektleiarerfaring og kunnskap om prosjektmetodikk
• erfaring med prosessleiing
• god innsikt i nærings- og samfunnsutvikling
• kjennskap til offentlege planprosessar

Det er ein fordel med:

• erfaring frå offentleg forvaltning
• kjennskap til "Nasjonal reiselivsstrategi 2030"

Personlege eigenskapar

• Gode samarbeidsevner
• Kreativ, løysings- og resultatorientert
• Initiativrik og ansvarsbevisst
• Evne til å arbeide strukturert og sjølvstendig
• God formidlingsevne, både munnleg og skriftleg på norsk
• Du må like å treffe og vere i dialog med andre

Vi tilbyr

• faglege og personlege utfordringar i eit godt og inspirerande arbeidsmiljø
• gode offentlege pensjons- og forsikringsordningar
• løn etter avtale
• fleksibel arbeidstid
• stilling i ei inkluderande arbeidslivsverksemd (IA-verksemd)
• eit godt kontormiljø i Leikanger/Sogndal eller i Vestlandshuset i Bergen

Andre opplysningar:

• Dersom du har spørsmål, ta gjerne ein prat med kontaktperson.
• Administrasjonsmålet i fylkeskommunen er nynorsk.
• Alle nytilsetjingar vert gjort med ei prøvetid på 6 månader.

Vi gjer merksam på at i følgje offentleglova § 25, 2. ledd kan opplysningar om søkjaren bli offentleggjort sjølv om du har oppmoda om ikkje å bli ført på offentleg søkjarliste. Dersom du har bedt om unntak frå offentleg søkjarliste vil du alltid bli varsla før søkjarlista vert offentleggjort.