Lotteri- og stiftelsestilsynet

Samfunnsoppdraget vårt er å sikre ansvarlege pengespel, ei sterk frivilligheit og trygge stiftelsar i Norge. Vi er underlagt Kultur- og likestillingsdepartementet, og har sidan oppstarten i 2001 halde til i Førde i Sunnfjord.

Vi har tre ulike fagavdelingar, og fleire støttefunksjonar, som HR, kommunikasjon og økonomi.

Avdeling for pengespel jobbar med tilsyn og kontroll for å sikre at norske pengespeltilbydarar driv i samsvar med lova. Dei jobbar også for å stanse ulovlege aktørar som forsøker å tilby spel retta mot norske kundar.

Avdeling for frivillighetsstøtte forvaltar fleire tilskotsordningar til frivillig sektor. Dei fører også tilsyn med Grasrotandelen til Norsk Tipping.

Stiftelsestilsynet skal blant anna sikre at norske stiftelsar driv lovleg og i tråd med formålet, men også bidra til at stiftelsar er ein attraktiv måte å utvikle samfunnet på. Dei rettleiar og fører tilsyn med norske stiftelsar, og har fokus på kunnskapsdeling om rolla stiftelsar spelar i det norske samfunnet.

Les 10 gode grunnar til å jobbe i Lotteri og stiftelsestilsynet.

Vi har eit godt arbeidsmiljø, og tek godt vare på våre tilsette. Vi tilbyr fleksitid, trening i arbeidstida, kantineordning og moglegheit for heimekontor.

Vi har i tillegg ein velferdskomité som finn på kjekke ting for oss, både i og utanfor arbeidstida. Vi har også mange toppturentusiastar på huset, så her er det gode moglegheiter for å hive seg med til fjells. Om topptur ikkje er di greie, så har våre tilsette fri tilgang til Sunnfjord Spa. Der er det treningsrom og svømmebasseng, i tillegg til sjølve spaet. Eller kanskje du heller vil bli med på quiz-laget vårt på Peppes? Vi har også fast quiz i kaffibaren i 5. etasje kvar dag etter lunsj for dei som vil vere med på det.

Om du lurer på noko meir om korleis det er å jobbe hos oss, så er det berre å ta kontakt 😊